الرجل الرمرام

قد ايه بيقرفني و يثير اشمئزازي نوعية الرجالة اللي عينهم زايغه (او الرجالة الخاينين في حالة الارتباط الرسمي )..

اللي هو يعني انت اعجبت ببنت كويسة و محترمة و هي كمان اعجبت بيك و المفروض ان في شئ حلو ما بينكم ..ليه ترمي كل دا و تبقي رمرام و عينك تزوغ علي كل بنت تشوفها؟!

يعني هل انت كراجل شايف ان البنات المحترمة موجودين كتير دلوقتي عشان تسيب حبيتك الكويسة و تروح ترتبط ((او حتي تشاغل)) واحدة تانية ؟

و بغض النظر عن فكرة الواحدة التانية دي محترمة برضو ولا لأ .. و حتي فكرة هل انت بتظلم حبيبتك معاك ولا لأ عشان دا مش موضوعي ..

انا اللي شغلني كيف يفكر الرجل الرمرام .. يعني هو الموضوع ايه من وجهة نظرك..

هل هو فضا مثلا؟ ولا دا طبع مش بيتغير ؟ ولا البنت اللي انت علقتها بيك مش ماليه عينك؟

-مهو لو فضا يبقي من باب اولي تستثمر مجهودك و وقتك مع البنت اللي ((المفروض بتحبها)) وتقرب ليها و تهتم بيها عشان هي كمان تبادلك نفس الشعور و ماتهملكش .. و من هنا علاقتكم تبقي اقوي و حبكم لبعض يزيد .. و الحب دا يتحول لارتباط رسمي و حياة سعيدة و استقرار..

الا اذا كنت مش عايز كل دا طبعا .. يبقي تكون صريح مع نفسك و معاها و بلاش تعلقها بيك و سيب بنت الحلال تشوف حياتها بقي ..

-و لو دا طبع فيك و انت عارف انك مش هتتغير , طيب مافكرتش انك تبص للموضوع من منظور تاني .. زي انك تحط نفسك مكان حبيبتك و تشوف انت ممكن تضايق ازاي لو هي فضلت تبص علي كل شاب وسيم شوية ؟!

ولا ازدواجية المعايير في مجتمعنا مخليك تحلل لنفسك الحرام و تحرمه علي البنت ؟ّ!

و بغض النظر عن الناحية الثقافية لمجتمعتنا .. لاني مش هبرر الغلط لا لبنت ولا ولولد ..

لكن اللي اقصده ان المشاعر واحدة سواء عند البنت او الراجل ..اللي هيجرحك و يجرح كرامتك برضو هيأثر فيها بنفس الشكل ..

زائد النقطة الأسوء و هي بعد ما البنت مشاعرها و كرمتها هتنجرح , انت متخيل انها ممكن تفضل تحبك زي الاول ؟ او حتي لو مش هتقدر ماتحبكش (لان الحب مش بزراير نضغط عليها فنبطل نحب) .. هل تعتقد كرمتها هتسمحلها تكمل معاك ؟

انا كبنت بقولك انا لو مكانها لا يمكن هقبل .. انا هحط قلبي تحت جزمتي و تفضل كرامتي عاليا فالسما .. ولو انت بتحبها بجد ..يبقي ماتلومش حد غير نفسك انك ضيعتها من ايدك .

-ولو البنت اللي معجب بيها/بتحبها مش ماليه عينك و عشان كدا اي واحدة حلوة تشوفها تشغلك .. طيب معلق نفسك و معلقها معاك ليه؟

قولها مش عايزك و في واحدو تانية و فضوها سيرة ..مهي المواضيع دي مافيهاش لا احراج ولا زعل..

يعني مثلا انا ك مها ..لو في نفس الموقف دا و حبيبي قالي "انا مش شايفك حلوة و مش ماليه عيني" ..

ولا هتضايق ولا كرامتي هتنجرح لعدة اسباب:

اولا لاني واثقة من نفسي و من جمالي جدا و هبقي بيني و بين نفسي شيفاه حمار و هبقي علي اقتناع تام ان

It's your loss! :) .

و ثانيا لاني عارفة ان الجمال نسبي , بمعني ان اللي انا شايفاه جميل من وجهة نظري ..مش شرط بالضرورة غيري يشوفوا بنفس الجمال .. و الكلام برضو ينطبق عليا .. مش معقول كل الناس هتشوفني جميلة.

وثالثا و الاهم اني هحمد ربنا اني شوفت الشخص دا علي حقيقته من واحنا لسه عالبر .. لأني هتأكد ان الشخص دا مش هو الشخص المناسب ليا اللي يصلح يكون زوجي و تأسس اسرة مع بعض , لاني لا هقدر اثق فيه و لا هقدر احترم طريقة تفكيرة السذاجة دي اللي بتختار بناء علي الشكل بس من غير الجوهر.. ولا بيجذبني اصلا الراجل اللي بيشدة جمالي او انوثتي قبل ما يعجب بتفكيري و شخصيتي الاول .. فما بالكم باللي اصلا مش شايفني و شايف حد تاني احسن مني .. يبقي هكمل معاه ازاي وانا مش عارفة احترمه؟!

فالرسالة دي لكل واحد عنية زايغة أو خاين .. يا ريت تراجع نفسك عشان هتخسر كتير اوي بأسلوبك دا . :)

~ #Maha~